Fé vôy lès-afêres come zèles sont, po in monde mèyeû, comifaut.

Po ç’tèle-ci ou ç’tèle-la qu’î tûzine ène miète, l’ ovradje artistique r’wéti di pus près dwèt rèsponde è prèmî à quate fondemints : do bia ( èst ce qui ça plét à l’ouy ? Èst ce qui ça pout fé ène saqwè au keûr ? ), dès bounes èt novèles-idéyes ( èst ce qui ça a d’djà stî vèyu ? Èst ce qui c’èst didins l’ minme win.ne qui lès-ôtes ovradjes di l’auteûr, è l’ dijant ôtremint : èst ce qu’on pout riconèche aujîyemint èt tot d’ chûte li cén, li cène qui l’a fé ? ), dèl vrée vîye ( èst ce qui ça pout fé pinser ? Èst ce qui ça vout dîre ène saqwè oubén ça n’ richène à rén ? ), do bon ( èst ce qui tot ç’ qu’i faut po l’ fé èst dins lès-ûzances et va t’nu longtimps ? ). Dji saye au mia èt tot l’ timps di t’nu compte di tot ça, mins èto qui mès pîces duvenut ièsse po totes lès boûsses èt mouchîs dins totes lès maujos. 

 

Avou d’èwoù ç’ qui dji vén, scoladjes, ocupadjes difèrints èt m' dimander qwè, dj’a r’çu èto ène maniére d’aguignî èt di trouver à r’dîre. Tot è rotant, dji vou mostrer ni roviant nén tot ç' qu'èst tchaud èt qui r'vé todi auzès novèles, dins l’ vré ç’ qui va èt ç’ qui n’ va nén, dins l’ vîye di tos lès djoûs, dins ç’ sôcièté au pus pârfond malade, nén jusse, bièsse, di sclinbwagne, si malaujîye èt à brére po branmint… èt qui, tot ça machî èchène, nos amwin.ne pa-t’t-avau au pîre. Echène mès-ovradjes, po l' cén qui tènawète î tûze, pèrmètnut di vûdî rademint dès-imaudjes qui poulenut ièsse vèyues à tos momints.

 

Po ène saquî di rèspon'sâbe, avou l' crédit dj'a, dji n' sé nén ièsse pus ègadjî. Lon èri, au diâle èt co pus lon d'arauveler dès caurs, do lèyî fé èt adîre, dès pîlerîyes, brèyadjes èt di mwèjes-idéyes, dj’a pris m’ kèdje èt paye à make dipus qui m’ paurt, è forboutant tot-à fét po ène planète mia arindjîe. Ça compte è prèmî po l’ djon.nèsse qui, eûchant gripé su l’ convwè è route, n’a nén tchwèzi parèy tchinis’.

 

Comint arin.ner cès riprézintadjes-là ôtrumint qui pauzès djiper, apicî cès couyonâdes avou mèzeure tant zèles sont, li pus sovint, gayes. In moyén d’ mouchî pus lon po rimostrer lès-istwêres pusqui c’è-st-insi qu’ ça s’ passe, c’èst di mète è avant su lès gârnichadjes ç’ qu’on n’ vout nén r’mârquer. Li wadjure, tot è èstant dins l'ûzance, di m' timps èt po l' cén qui vént, c’èst d’ fé tofêr do noû, è sôrtichant do rén dès fôrmes èt dès lignes, vikantes èt fwates, jamés prézintéyes. Chake novèle pîce èst mèteuwe asto dès-ôtes po crèchî li propôzicion. Èn-ârt sièrvant à ène saqwè, mins èco po riconèche aujîyemint èwoù ç’ qu’on a tcheû, dins qué monde on d’meure. Mès-ovradjes ni mwin.nut nén au disbautchemint, ni au toûrmint ni à sokî né rén, mins rèwèyenut, lumenut èt boutenut à fé boudjî, c’èst poqwè i sont vikants.

 

Si cias di-d-ci ni disfindnut nén leûs-èritances di leû payis, quî l’ f’rè po zèls ? Chake bèzogne rintêre dins dès « Sin.nes dèl vîye di tos lès djoûs » èt il è-st-èstampé di m’ catchèt « JS dèl Basse-Sambre ». Li Basse-Sambe, c’èst l’ nom dèl place à l’ valèye di Chârlèrwè, avou ène linwe walone qui diskind tot drwèt do latén, apwârtée pa nos tayons. Ène èritrance qui compte come mésse racène po sawè s’ bati, mins asteûre lèyîe là ( compurdoz pusqui côpé d’ ça, sins pad’zos solide, i manque in fameûs bokèt à branmint po s’astamper… qui s’ sint rogneûs s’ grète ).

 

Tot è purdant l’ timps po chake pîce dèl spèpyî comifaut, sins rovyî sès clignètes sovint ârsouyes, chakin èst libe di sondjî à ç’ qui ça vout dîre po lî. Saquants ovradjes rachènés, mètus échène, pèrmètnut di rèfwârcî ou co di fé spritchî ène riprézintâcion oubén ène ôte.

 

On n’ coûrt nén po mostrer ni acèrtiner à li minme. Tant qu’à mi, c’èst l’ârt po tortos, lès cias sins caur èto. Dj’a fé l’ tchwès po mès scultures do modeladje, do mouladje... bén malauji à conèche mès seûle tècnique po èmantchî mès riprézintadjes, èt do tiradje dès-ovradjes, di lès fé èn-aurzîye èmayîye cûte, fwârt èn-ûsadje èmon nos-ôtes, qui si on-ènn’a sogne, sûront bén dès vikérîyes. Chake pîce pôréve ièsse ossi féte è bronze, à saquants tiradjes, oubén pus ôte èt laudje. Po lès tauvias, dji m’ siè d’ène tècnique d’Imprimadje. Tot d’ chûte è scarwétant, on wèt qu’ c’èst avou li minme tièsse èt lès minmès mwins qu'èle-z-ont stî totes fétes. I faut, dins leû maniére di fé, satchî mwints ovradjes, mins i gn’a jamés deûs parèys : lès lèdjêres difèrinces ètur lès tiradjes ni sont nén dès brichoderîyes mins c’èst pace qui c’èst fé à l’ mwin, èt ça leû done à chakin in p’tit caractére à paurt. È fiant come ça, branmint  di mès ovradjes sont aprèstés èt poulenut ièsse èpwârtés à tos momints.

 

Voci don dès dîres po ièsse anoyeûs mins èto po s’ ragrawyî. Gn’a dès djins qu’è sont v’nus à paurtadjî cès pinséyes. I-z-ont véci l’astchèyance di mète autoû d’ zèls dès-afêres qui riprézintenut leûs-idéyes èt poqwè nén èto lès spaude.